रत्नागिरी : रिलायन्स फाउंडेशन माहिती सेवा, जिल्हा शासकीय रुग्णालय व महिला आर्थिक महामंडळ यांच्या संयुक्त विद्यमाने रत्नागिरी तालुक्यातील ओशी, हरचिरी येथे महिलांसाठी नुकतेच आरोग्य शिबिर घेण्यात आले. या वेळी उच्च रक्तदाब तपासणी, रक्तातील साखरेचे प्रमाण, मौखिक आजार आदींची तपासणी करण्यात आली. तसेच मानसिक आजार, स्तनाच्या कॅन्सरची लक्षणे व उपचार यांसंदर्भात मार्गदर्शन करण्यात आले.
जिल्हा रुग्णालयातर्फे डॉ. उत्तम कांबळे (वैद्यकीय अधिकारी, एनसीडी विभाग), डॉ. मधुरा भागवत (मानसिक आरोग्य विभाग), डॉ. गौरव पाटील (फिजिओथेरपिस्ट), स्टाफ नर्स प्राजक्ता जक्कर, श्री. आहेर, सामाजिक कार्यकर्त्या श्वेता चव्हाण आदी या वेळी उपस्थित होते.
डॉ. उत्तम कांबळे यांनी स्तनाचा कॅन्सर ओळखण्याची पद्धत, उपचार, तसेच महिलांच्या आरोग्याबद्दल माहिती सांगितली. डॉ. मधुरा भागवत यांनी मानसिक आरोग्याबद्दल माहिती दिली. डॉ. गौरव पाटील यांनी सांधेदुखी व त्यावरील व्यायामांची माहिती दिली. महिला आर्थिक विकास महामंडळाच्या दीपाली देवरुखकर व वैशाली सॉलिम यांनी कार्यक्रमाचे नियोजन, सूत्रसंचालन केले.
रिलायन्स फाउंडेशनचे जिल्हा व्यवस्थापक राजेश कांबळे व कार्यक्रम सहायक विनोद गवाणकर यांनी कार्यक्रमाचे व्यवस्थापन केले. महिला आर्थिक विकास महामंडळाच्या वतीने कार्यक्रमासाठी सहकार्य लाभले. या आरोग्य तपासणी कार्यक्रमाला महिलांचा चांगला प्रतिसाद मिळाला.